‘संघीय र प्रादेशिक अस्पतालहरु पूर्ण क्षमतामा सञ्चालन गर्ने वातावरण बनाउनुपर्छ’

काठमाडौं, साउन १३ : स्वास्थ्य तथा जनसङ्ख्यामन्त्री प्रदीप पौडेलले संघीय र प्रादेशिक अस्पतालहरु पूर्ण क्षमतामा सञ्चालन गर्ने वातावरण बनाउन आवश्यक रहेको बताएका छन्। 

मंगलबार काठमाडौंमा आयोजित जनस्वास्थ्य आपतकालीन कार्यसञ्चालन केन्द्रको क्षमता अभिवृद्धि कार्यक्रममा बोल्दै उनले अहिले स्वास्थ्यमा लगानी एकदमै कम रहेको बताउँदै लगानी अभिवृद्धि गर्नुपर्ने बताए।

मन्त्री पौडेलले लगानी अभिवृद्धिको लागि आफू मन्त्रीभएदेखि तीनवटा प्रस्ताव अगाडि बढाउँदा पनि स्वीकृति नभएको गुनासो गरे। 

‘संघीय र प्रादेशिक अस्पतालहरु जहाँ छन् तिनीहरु पूर्ण क्षमतामा सञ्चालन हुनुपर्यो। त्यसलाई आवश्यक पर्ने जनशक्ति उपलब्ध हुनुपर्यो। अहिले स्वास्थ्यमा लगानी एकदमै कम छ। ०४८ सालदेखि यसमा लगानी नै भएको छैन,’ उनले भने, ‘म मन्त्रीभएदेखि तीनवटा प्रस्ताव अगाडि बढाइएको हो तर स्वीकृति नै भएको छैन। आफूलाई त्यो ठिक लागे सहमत तर आफूलाई राम्रो नलागे त्यो गर्नै हुन्न भन्ने मानसिकता रहेछ। हामीहरुले स्वास्थ्य संस्थाहरु जनशक्तिको हिसाबले पूर्ण क्षमताले चल्न सक्ने बनायौं भने संकट व्यवस्थापनमा ठूलो सहयोग पुर्याउन सक्छ।’  

मन्त्री पौडेलले दक्ष जनशक्तिमा र अस्पतालमा क्षमता वृद्धि गर्नु नै नागरिकलाई सेवा पुर्याउनु भएको भन्दै प्रभावकारी सेवा प्रदानमा विशेष ध्यान दिनुपर्नेमा जोड दिए। उनले नीतिगत स्पष्टता नहुँदा एउटा सरकार र अर्को सरकारबीच समन्वयात्मक भूमिकामा समस्या भएको बताए।