‘देश माओवादीमय र प्रचण्डमय हुने अवस्था देखिरहेको छु’

काठमाडौं, जेठ १० : नेकपा माओवादी केन्द्रका अध्यक्ष पुष्पकमल दाहालले देशका वृद्धवृद्धाहरु, युवायुवतीहरु र बालबालिकाहरु एकचोटि फेरी माओवादीप्रति समर्पित हुने भाव पैदा भएको देखिएको बताएका छन्।

‘जनतासँग माओवादी–मध्यपहाडी (पुष्पलाल) लोकमार्ग जनजागरण अभियान’ अन्तर्गत कास्की रानीपौवा,  पोखरामा आयोजित जनसंवाद कार्यक्रमलाई सम्बोधन गर्दै उनले निकै ठूलो जिम्मेवारी माओवादीको काँधमा र एकचोटि फेरि प्रचण्डको काँधमा नयाँ क्रान्ति एवम अभिभारा दिन नेपाली जनता तयार भएको बताए।

‘यो देशका वृद्धवृद्धाहरु, युवायुवती र बालबालिकाहरु पनि एकचोटि फेरी माओवादीप्रति समर्पित हुने भाव पैदा भएको देखिएको छ। देश माओवादीमय, स्वतन्त्रमय बन्दै गएको छ,’ उनले भने, ‘हामी ०६४ जस्तै देश माओवादीमय हुने र प्रचण्डमय अवस्था देखिरहेको छु। निकै ठूलो जिम्मेवारी माओवादीको  काँधमा वा प्रचण्डको काँधमा नयाँ क्रान्ति एवम अभिभारा दिन नेपाली जनता तयार भएको महशुस गरेको छु।’

अध्यक्ष दाहालले पार्टीले सञ्चालन गरेको ‘जनतासँग माओवादी मध्यपहाडी लोकमार्ग जागरण अभियान’ राष्ट्रिय एकताको अभियान बन्न पुगेको दाबी गरे।

उनले अभियानका क्रममा पार्टीका सबै शीर्ष नेताहरु सहभागी भएको र त्यस क्रममा जनता, व्यवसायी, कर्मचारी, बुद्धिजीविहरु लगायतबाट प्राप्त सुझावहरुलाई पार्टीले ग्रहण गरेको पनि बताए।