सामाजिक र आर्थिक समृद्धिको अगुवाइ माओवादीले गर्छ : अध्यक्ष दाहाल

पर्वत, जेठ ९ : नेकपा माओवादी केन्द्रका अध्यक्ष पुष्पकमल दाहालले राजनीतिक परिवर्तनपछि सामाजिक र आर्थिक समृद्धिको अगुवाइ माओवादीले गर्ने बताएका छन्।

‘जनतासँग माओवादी, मध्यपहाडी लोकमार्ग जनजागरण अभियान’को क्रममा आज पर्वत सदरमुकाम कुश्मामा आयोजित जनसंवाद कार्यक्रमलाई सम्बोधन गर्दै उहाँले आगामी निर्वाचनमा माओवादीले कसैको सहारा नलिने बताए।

अध्यक्ष दाहालले अबको निर्वाचनमा माओवादी आफ्नै तागतले उभिने पनि बताए। हुलाकी राजमार्ग र मध्यपहाडी लोकमार्गको जनजागरण अभियानमा देखिएको जनताको उत्साहले आफू पनि उत्साहित भएको उनको भनाई थियो।

‘माओवादी नेतृत्वमा आए सुशासन कायम हुन्छ र  भ्रष्टाचारको अन्त्य हुन्छ भन्नेहरु धेरै भेटेका छौं,’ अधयक्ष दाहालले भने, ‘हामी अहिले जनतासँग साक्षात्कार गरिरहेका छौं, पार्टीलाई मजबुत बनाउँदै कार्यकर्तालाई एकत्रित गरिरहेका छौं।’

समाजवादी मोर्चाले सरकारलाई सच्चिन र मुलुकको हितमा काम गर्न खबरदारी गर्दै आएको उनले बताए।