कसैलाई पनि बहुमत ल्याउन नदिने प्रणाली हामीसँग छ : प्रधानमन्त्री ओली

काठमाडौं, जेठ ५ : प्रधानमन्त्री एवं नेकपा (एमाले) का अध्यक्ष केपी शर्मा ओलीले आगामी २०८४ सालमा हुने निर्वाचनमा एमालेले एकल बहुुमत ल्याउने दाबी गरेका छन्।

सोमबार नेपाल उत्पीडित जातीय मुुक्ति समाजको सातौं राष्ट्रिय महाधिवेशनको उद्घाटन गर्दै प्रधानमन्त्री ओलीले एमालेले एकल बहुुमत ल्याउन चुनौतीपूर्ण भएतापनि यो काम एमालेका लागि सम्भव रहेको भन्दै मिसन ०८४ मा एमालेको एकल बहुमत ल्याउनेगरी तयारीमा जुटिरहेको बताए।

‘हामीले मिसन ०८४ को उद्देश्य लिएका छौं। एकल बहुमत ल्याउने उद्देश्य लिएको छौं । यो असम्भव छैन। यो विलकुल सम्भव उद्देश्य हो। कसैलाई पनि बहुमत ल्याउन नदिने प्रणाली हामीसँग छ,’ प्रधानमन्त्री ओलीले भने, ‘समानुपातिकसहितको विद्यमान परिपाटीबाट साधारणतयाः कुनै एक दलको बहुुमत आउन गाह्रो छ तर हामीले प्रणाली चुनिसकेको छौं। चुनौतीपूर्ण छ ,तर यो काम एमालेका लागि सम्भव छ। त्यसैले मिसन ०८४ एमालेको एकल बहुमत ल्याउनेगरीको तयारीमा जुटिरहेका छौं।’

त्यस्तै उनले आफूहरु व्यक्तिगत र पार्टीगत स्वार्थ नहेरी देशको सुशासन, स्थिरता, विकास, समृद्धि, राष्ट्रिय स्वाधिनता र अखण्डताका लागि काम गरिरहेको दाबी गरे। विपक्षीहरुले जनतामा भ्रम छर्न खोजेको भन्दै त्यसलाई बुझेर आफैं त्यसकाविरुद्ध लाग्नुपर्ने उनले बताए।

‘पार्टीका रुपमा विकसित गर्न लाग्नुुपर्छ। व्यक्तिगत र पार्टीगत स्वार्थ नहेरी देशको सुशासन, स्थिरता, विकास, समृद्धि, राष्ट्रिय स्वाधिनता र अखण्डताका लागि काम गरिहेका छौँ । अराजकतावादीहरुले यस प्रयासमा भाँजो हाल्न सक्छन्,’ उनले भने, ‘अराजकतावाद सदैव हाम्रो दुुष्मन हो। विपक्षीहरुले जनतामा हाम्राविरुद्ध भ्रम फिँजाउन खोजेका छन्। त्यस्तो भ्रम चिर्न हामी सुदृढ र एकताबद्ध भएर लाग्नुपर्नेछ। अहिले हामीमाथि प्रहार भइरहेको छ।’

प्रधानमन्त्री ओलीले उनले एमाले पार्टी र आन्दोलन एक दिनको भुल्को नभएको भन्दै कुनै एउटा चटके कुरा गर्दिएर हाहा..हु.. गर्ने जमात पनि नभएको बताए।