यी हुन् विश्वका १० धनाढ्य, कस्को सम्पत्ति कति छ?

काठमाडौं, चैत २५ : अमेरिकी म्यागजिन  फोर्ब्सले विश्वका धनाढ्यहरूको सूची सार्वजनिक गरेको छ।

टेस्लाका मालिक इलन मस्क विश्वका धनाढ्यहरूको सूचीमा पहिलो नम्बरमा कायम भएका छन्।

अमेरिकी राष्ट्रपति डोनाल्ड ट्रम्पलाई सल्लाह दिने डिपार्टमेन्ट अफ गभर्नमेन्ट इफिसियन्सी (डोज) प्रमुख समेत रहेका टेस्ला कार निर्माता कम्पनीका मालिक इलन मस्क विश्वकै धनाढ्य कायम भएका हुन्।

करोडौं डलर खर्च गरेर चुनाव जिताएका ट्रम्पका नीतिहरूका कारण यसपटक मस्कको सम्पत्तिमा भारी गिरावट आउने आकलन गरिए पनि उनले धनाढ्य सूचीको शीर्षस्थान कायम राखेका हुन्।

धनाढ्यहरूको सूचीको शीर्ष १० मा ८ जना संयुक्त राज्य अमेरिकाकै छ। पाँचौं नम्बरमा फ्रान्स र नवौं नम्बरमा स्पेनका धनाढ्य छन्।

इलन मस्क

टेस्ला र स्पेसएक्सका मालिक इलन मस्क यो वर्ष पनि विश्वको सबैभन्दा धनी व्यक्तिको शीर्ष स्थानमा छन्। उनको कुल सम्पत्ति ३४२ अर्ब डलर रहेको फोर्ब्सले जनाएको छ। प्रविधि र नवप्रवर्तनमा उनको योगदानले यो स्थान कायम राख्न मद्दत गरेको छ।

मार्क जुकरबर्ग

फेसबुक र मेटाका संस्थापक मार्क जुकरबर्ग दोस्रो स्थानमा छन्। उनको सम्पत्ति २१६ अर्ब डलर पुगेको छ। सामाजिक सञ्जाल र कृत्रिम बुद्धिमत्तामा उनको लगानीले यो उचाइ दिएको हो।

जेफ बेजोस

अमेजनका संस्थापक जेफ बेजोस तेस्रो नम्बरमा छन्। उनको सम्पत्ति २१५ अर्ब डलर छ। ई-कमर्स र क्लाउड कम्प्युटिङमा उनको प्रभाव अझै कायम छ।

ल्यारी एलिसन

ओरेकलका सह-संस्थापक ल्यारी एलिसनको सम्पत्ति १९२ अर्ब डलर छ। उनी चौथो स्थानमा छन्। सफ्टवेयर उद्योगमा उनको योगदान उल्लेखनीय छ।

बरनार्ड अर्नोल्ट

फ्रान्सका विलासिता सामग्रीका बादशाह बरनार्ड अर्नोल्ट पाँचौं स्थानमा छन्। उनको सम्पत्ति १७८ अर्ब डलर छ। एलभीएमएच समूहका मालिक उनी विश्वका शीर्ष धनाढ्यमा सधैं अग्रपंक्तिमा रहन्छन्।

वारेन बफेट

 लगानीका गुरु वारेन बफेट छैटौं स्थानमा छन्। उनको सम्पत्ति १५४ अर्ब डलर छ। बर्कशायर ह्याथवेका मालिक उनको लगानी रणनीति विश्वप्रसिद्ध छ।

ल्यारी पेज

गुगलका सह-संस्थापक ल्यारी पेजको सम्पत्ति १४४ अर्ब डलर छ। उनी सातौं स्थानमा छन्। इन्टरनेट सर्च इन्जिनमा उनको योगदानले यो स्थान दिलाएको हो।

सर्जे ब्रिन

गुगलकै अर्का सह-संस्थापक सर्जे ब्रिन आठौं नम्बरमा छन्। उनको सम्पत्ति १३८ अर्ब डलर छ।

अमान्सियो ओर्टेगा

 स्पेनका फेसन उद्योगका मालिक अमान्सियो ओर्टेगाको सम्पत्ति १२४ अर्ब डलर छ। उनी नवौं स्थानमा छन्। जारा ब्रान्डका संस्थापक उनको प्रभाव फेसन क्षेत्रमा ठूलो छ।

स्टिभ बाल्मर

माइक्रोसफ्टका पूर्वसीईओ स्टीभ बाल्मर दसौं स्थानमा छन्। उनको सम्पत्ति ११८ अर्ब डलर छ।