संसद सचिवालय भन्यो– सम्पत्ति शुद्धीकरणको मुद्दा दायर भएकोले रविको संसद पद निलम्बन भएको हो

काठमाडौं, चैत ६  : सम्पत्ति शुद्धीकरणको मुद्दा दायर भएकोले राष्ट्रिय स्वतन्त्र पार्टीका सभापति रवि लामिछानेको संसद पद निलम्बन भएको संघीय संसद सचिवालयले जनाएको छ।

२०८१ कात्तिक ३ गते प्रतिनिधि सभा सदस्य रवि लामिछाने कास्की जिल्ला अदालतको पक्राउ अनुमतिबमोजिम फौजदारी कसुरको अनुसन्धानको क्रममा पक्राउ परेका थिए। पक्राउ परेको व्यहोराको सूचना प्रतिनिधि सभा नियमावली, २०७९ को नियम २४८ को उपनियम (२) को प्रयोजनको लागि प्राप्त भएको सचिवालयले उल्लेख गरेको छ ।

संसद सचिवालयले हालै प्रकाशन गरेको ‘संसद दर्पण’को ३६औं अंकमा यस्तो उल्लेख गरिएको हो।

‘२०८१ पुस ८ गते प्रतिनिधि सभा सदस्य रवि लामिछानेविरुद्ध कास्की जिल्ला अदालतमा सम्पत्ति शुद्धीकरण निवारण ऐन, २०६४ को दफा २२ बमोजिम मुद्दा दायर भएकोले सोही ऐनको दफा २७ को कानूनी व्यवस्थाको प्रयोजनको लागि सम्माननीय सभामुखको निर्देशानुसार सूचना प्रकाशनसम्बन्धी कार्यसम्पादन भएको थियो,’ संसद दर्पणमा उल्लेख गरेको छ।

लामिछानेविरुद्ध सहकारी ठगी, संगठित अपराधसहित सम्पत्ति शुद्धीकरणमा पनि कास्की जिल्ला अदालतमा अभियोगपत्र दर्ता भएको जानकारीपत्र प्रहरीले सभामुख देवराज घिमिरेलाई पत्रमार्फत गराएको थियो। त्यसपछि गत ८ पुसमा सभामुख देवराज घिमिरेले लामिछानेको सांसद पद निलम्बन हुने निर्णय गरेका थिए।