लेखा समिति सभापतिकी श्रीमती जोडिएको उमागौरी सहकारीका अध्यक्षले गरे अदालतमा आत्मसमर्पण
मोरङको धनपालथानस्थित उमागौरी कृषि सहकारीका अध्यक्ष शम्भुप्रसाद रौनियार सोमबार अदालतमा हाजिर भएका छन् ।
विराटनगर, माघ १४ : मोरङको धनपालथानस्थित उमागौरी कृषि सहकारीका अध्यक्ष शम्भुप्रसाद रौनियार सोमबार अदालतमा हाजिर भएका छन् ।
कानुन व्यवसायीलाई साथमा लिएर रौनियार दिउँसो मोरङ जिल्ला अदालतमा हाजिर भएका हुन् ।
उक्त सहकारीमा सार्वजनिक लेखा समितिका सभापति तथा एमाले सांसद ऋषिकेश पोखरेलको पत्नी अञ्जला कोइराला पनि प्रतिबादी हुन् ।
अदालतमा उपस्थित भएपछि सहकारी अध्यक्ष रौनियारको न्यायाधीश अरुणकुमार झाको इजलासमा बयान सुरु भएको छ । बयान सकिएपछि थुनछेक बहस सुरु हुने छ ।
सहकारी रकम अपचलन प्रकरणमा रौनियारसहित २६ जना विरुद्ध मोरङ अदालतमा मुद्दा दायर भएकोमा २१ जना अझै फरार छन् । एक जना प्रतिबादीलाई पुर्पक्षको लागि थुनामा पठाइएको छ ।
सहकारी सञ्चालक रोशन राजवंशीलाई पुर्पक्षको लागि थुनामा पठाइएको हो । अर्का अभियुक्त कोइराला र सन्तलाल खवासलाई भने धरौटीमा छाडिएको छ ।
उनीहरुविरुद्ध गत मंसिर २७ गते जिल्ला अदालतमा अभियोगपत्र दायर भएको थियो ।
