लुम्बिनी वर्ल्ड पिस फोरमका संस्थापक गौतम इटालीमा सम्मानित

काठमाडौं, पुस १३ : लुम्बिनी वर्ल्ड पिस फोरमका संस्थापक तथा अध्यक्ष बासु गौतमलाई इटालीको सार्नो नगरपालिकाले ‘पिस एम्ब्यासडर’ रुपमा सम्मान गरेको छ। 

जलवायु संकटको सामना र सांस्कृतिक समझदारीको प्रवर्द्धनमा पुर्‍याएको योगदानका कदर गर्दै गौतमलाई इटालीको ‘एस् मु डो शान्ति र न्याय’ नामक संस्था तथा सार्नो नगरपालिकाले संयुक्त रुपमा सम्मान गरेका हुन्।

सार्नोका मेयर डा. फ्रान्सेस्को स्क्विलान्ते, संस्कृति परिषद सदस्य प्रोफेसर अन्ना मारिया डेला पोर्टा र ‘एस् मु डो शान्ति र न्याय’की अध्यक्ष  डा. ग्लाडिस माबेल क्यान्टेल्मीले सम्मान गरेका थिए। 

लुम्बिनी वर्ल्ड पिस फोरममार्फत गौतमले विगत एक दशकदेखि नेपाल, कम्बोडिया, जापान, म्यान्मार, सिंगापुर, फ्रान्स, भारत , इजिप्टलगायत देशमा ‘दिगो शान्तिका लागि सांस्कृतिक समझदारी’ कार्यक्रम सञ्चालन गर्दै आएका छन्। 

फोरममार्फत उनले श्रीलंका, बांगलादेशलगायत दक्षिण एसियाली देशहरुमा जलवायु न्यायको मुद्दालाई अघि सार्दै अभियान सञ्चालन गर्दै आएका छन्।