अबको शिक्षा सीप र रोजगारीसँग जोडिनुपर्छ : मुख्यमन्त्री लामा
उनले भने–‘अध्ययन र सीप एकातिर काम अर्काेतिर गर्नाले युवा विदेशिनु परिरहेको छ त्यसैले जे पढेका छौं, जे सीप छ सोही सीप अनुसारको रोजगारी गर्नुपर्छ।’
मकवानपुर, पुस १२ : बागमती प्रदेशका मुख्यमन्त्री बहादुर सिं लामाले अबको शिक्षा सीप र रोजगारीसँग जोडिनुपर्ने बताएका छन्।
शुक्रबार हेटौँडास्थित मकवानपुर बहुमुखी क्याम्पसद्वारा सञ्चालित विजनेश इन्क्युवेसन सेन्टर उद्घाटन गर्नुहुँदै मुख्यमन्त्री लामाले प्रविधिमैत्री र अध्ययन अनुसारको सीप पनि जरुरी रहेको बताए।
उनले भने–‘अध्ययन र सीप एकातिर काम अर्काेतिर गर्नाले युवा विदेशिनु परिरहेको छ त्यसैले जे पढेका छौं, जे सीप छ सोही सीप अनुसारको रोजगारी गर्नुपर्छ।’
औद्योगिक क्षेत्र समेत रहेको मकवानपुरमा उद्योगसँगको सहकार्यमा विषयवस्तु अध्यापन गराउनु पर्नेमा जोड दिँदै मुख्यमन्त्री लामाले पढाइका क्रममा शिक्षक र विद्यार्थी दुवै सकारात्मक रहनुपर्ने बताए।
कक्षा १२ सम्मको अध्ययनपछि युवा विदेश जानेको लर्काे लागेकाले पढाइसँगै सीप सिकेर पढ्दै काम गर्दै गर्दा युवा शक्ति विदेशिनुमा रोक्न सकिने उनको भनाइ थियो।
