सत्ता सहकार्य मजबुत बनाउन कांग्रेस-एमालेले बनायो संघदेखि जिल्लासम्म संयन्त्र

काठमाडौं, कात्तिक २१ । सत्ता सहकार्यलाई सहजीकरण गर्न नेपाली कांग्रेस र नेकपा एमालेले तीनै तहमा संयन्त्र बनाएका छन् ।

संघ, प्रदेश र जिल्ला तहमा कांग्रेस र एमालेले संयुक्त संयन्त्र बनाएका हुन् ।

संघको संयन्त्रमा कांग्रेसबाट उपसभापति पूर्णबहादुर खड्का, महामन्त्री गगन थापा, केन्द्रीय सदस्य रमेश लेखक र डा.आरजु राणा देउवा छन् भने एमालेबाट वरिष्ठ उपाध्यक्ष ईश्वर पोखरेल, उपाध्यक्ष विष्णुप्रसाद पौडेल, महासचिव शंकर पोखरेल र उपमहासचिव विष्णु रिमाल सदस्य छन् ।

उक्त संयन्त्रले सरकारको काम कारबाहीलाई प्रभावकारी बनाउने छ ।

सत्ता साझेदारबीच आवश्यक समन्वय गर्नेगरी संयन्त्र बनाइएको जनाइएको छ ।

एमालेले जिल्ला र प्रदेशको संयन्त्रमा रहने सदस्यको टुंगो लगाए पनि कांग्रेसले भने संयन्त्रका सदस्यहरुबारे निर्णय लिन बाँकी छ ।