कपिलवस्तुमा पोखरीमा डुबेर दुई बालकको मृत्यु

बेलहवा, चैत १४ : कपिलवस्तुमा माछा पोखरीमा डुबेर एकै घरका दुई बालकको मृत्यु भएको छ। 

शुक्रबार दिउँसो कपिलवस्तु नगरपालिका–८ वेलहवामा रहेको माछा पोखरीमा डुबरे तरबेज धुनिया मुसलमानका छोराहरु १० वर्षीय अरमान र १२ वर्षीय सलमानको मृत्यु भएको हो।
 
उनीहरु गाउँको सामुदायिक माछापालन पोखरीमा नुहाउन गएका बेला डुबेका थिए। अचेत अवस्थामा भेटिएका उनीहरुलाई उद्दार गरी अस्पताल लगिएपनि जिल्ला अस्पताल तौलिहवाले मृत घोषित गरेको प्रदेश ५ का प्रहरी प्रवक्ता  नवराज पोखरेलले जानकारी दिए।

शब पोष्टमार्टमपछि परिवारको जिम्मा लगाइएको प्रहरीले जनाएको छ।