सुनकोसीमा बेपत्ता भएका तीन बालबालिकामध्ये एकजनाकाे शव भेटियाे

काठमाडौं, चैत १३ : सुनकोसी नदीमा बेपत्ता भएका तीन बालबालिकामध्ये एकजना मृत अवस्थामा भेटिएका छन्।

उदयपुरको त्रियुगा नगरपालिका-१४ स्थित धाप्लाङमा आइतबार होली मनाएर पौडी खेल्ने क्रममा बेपत्ता भएकामध्ये मंगलबार एकजनाको शव भेटिएकाे सशस्त्र प्रहरीको बराह बाहिनीका डीआईजी अन्जनीकुमार पोखरेलले जानकारी दिए।

धाप्लाङ घाटभन्दा करिब १ किलोमिटर तल त्रियुगा-१४ का ९ वर्षीय रिदम मगरकाे शव भेटिएकाे हाे। रिदमकाे शव पोष्टमार्टमका लागि जिल्ला अस्पताल पठाइएको छ।

बेपत्ता दुई बालबालिकालाई सशस्त्र प्रहरीको गोताखोर टोली, स्थानीयवासीलगायतले खोजी गरिरहेका छन्। उनीहरू त्रियुगा-१४ साउनेका ११ वर्षीया रेखा मगर र ८ वर्षीय लोकबहादुर मगर हुन्।