विप्लव समूहका जिल्ला इन्चार्जसहित दुई पक्राउ

रौतहट, चैत ८ : नेत्रविक्रम चन्द 'विप्लव' समूहका रौतहट जिल्ला इन्चार्जसहित दुई जनालाई प्रहरीले पक्राउ गरेको छ। पक्राउ पर्नेमा जिल्ला इन्चार्ज सङ्केत भनिने कुमार राई र जिल्ला सदस्य जगत् गुरुङ रहेको इलाका प्रहरी कार्यालय चन्द्रपुरका प्रहरी नायब उपरीक्षक हेमबहादुर शाहीले बताए।

पक्राउ परेका राई र गुरुङको साथबाट एक थान कटुवा पेस्तोल तथा एउटा हाते ग्रिनेड बरामद गरिएको छ। पक्राउ परेका राई र गुरुङमाथि आवश्यक कारवाहीका लागि प्रक्रिया अगाडि बढाइएको प्रहरीले जनाएको छ।

गोप्य सुचनाको आधारमा प्रहरी टोलीले उनीहरुलाई मकवानपुर तथा रौतहटको सीमा जङ्गलबाट शनिबार पक्राउ गरेको प्रहरी नायब उपरीक्षक शाहीले बताए।