‘नेपालको पर्यटन प्रवर्द्धनका लागि धेरै पर्यटक होइन गुणस्तरीय पर्यटक ल्याउनुपर्छ’

काठमाडाैं प्रेस, चैत ९: विश्वविख्यात ट्राभल्स एजेन्सी इन्ट्रपेडका सहसंस्थापक तथा अध्यक्ष ड्यारेल वेडले अहिले तीन दिने नेपाल भ्रमणका क्रममा काठमाडौंमा छन् । उनको स्वागतमा आयोजित कार्यक्रममा उनले विश्वव्यापी पर्यटनका साथै नेपालको पर्यटन क्षेत्रको प्रवद्र्धन तथा समृद्धिका बारेमा पर्यटन व्यवसायीसँग अन्तरक्रिया गरेका थिए ।

‘कतिजना पर्यटक आएभन्दा पनि कस्ता पर्यटक आए भन्ने कुराले पर्यटन क्षेत्रमा बढि प्रभाव पार्छ, इन्ट्रपेड सुरु भएदेखि नै हामीले नेपालमा पर्यटक पठाइरहेका छौं । मेरो विचारमा नेपालले पर्यटकको संख्यामा भन्दापनि गुणस्तरीय पर्यटक ल्याउन बढि जोड दिए समग्र पर्यटन क्षेत्रको विकास हुन्छ,’ वेडले भने ।

कार्यत्रममा वेडले इन्ट्रपेड स्थापना नेपालकै कारण सम्भव भएको पनि स्मरण गरे । ‘सन् १९८४ मा विश्वविद्यालयको अध्ययनपछि म तीन महिना दक्षिण–पूर्वी एसियाको भ्रमणमा निस्किएिको थिएँ,’ उनले भने, ‘भ्रमणका क्रममा काठमाडौं आइपुग्दा मलाई यहाँको अनुभव निकै प्रेरक महसुस भयो । भ्रमणले जीवनमात्र नभएर संसारलाई हेर्ने दृष्टिकोणमा पनि परिवर्तन गर्ने रहेछ भन्ने बुझेँ । मलाई धेरैभन्दा धेरै मान्छेलाई यस्तै प्रेरक भ्रमण गराउन मन लाग्यो, र इन्ट्रपेडको जन्म भयो ।’

अष्ट्रेलियाको मेलबर्नमा मुख्यालय रहेको इन्ट्रपेडले विश्वका १५० देशमा विभिन्न पर्यटकीय क्षेत्रको भ्रमण गराउँदै आएको छ । नेपाल लगायत २८ वटा मुलुकमा इन्टरपेडले कार्यालय स्थापना गरेर भ्रमण गराउँदै आएको छ। इन्टरपेड विश्वको सबैभन्दा धेरै पर्यटकलाई भ्रमण गराउने ट्राभल एजेन्सी मध्ये एक हो।

२०२३ मा इन्ट्रपेडले २ लाख ५० हजार पर्यटकलाई विभिन्न देशको भ्रमण गराएको थियो । जसमध्ये ४ हजार पर्यटक नेपाल आएका थिए । इन्ट्रपेडले २०२४ मा ५००० पर्यटक नेपाल ल्याउने लक्ष्य लिएको छ ।

अन्य कम्पनीहरुले भ्रमणकर्ताहरुलाई विभिन्न ठाउँमा लैजाने तर तारे होटल र रिसोर्टमा राखेर त्यो ठाउँको मौलिकताबाट टाढै राख्ने गरेको पनि वेडले गुनासो गरे । तर, इन्ट्रपेड घुम्ने प्याकेजमात्र बेच्ने कम्पनी नभएको उनले जिकिर गरे ।

‘हामी नयाँ ठाउँमा पुग्नुलाई मात्र भ्रमण मान्दैनौं । भ्रमण सफल हुनका लागि जुन ठाउँमा पुगेको छ त्यहाँको समुदायसँग नजिक हुनुपर्छ । भ्रमण भनेको ‘कल्चरल एक्स्चेन्ज’ हो । भ्रमणका क्रममा पर्यटकले केही नयाँ कुरा पाइरहेको वा अनुभव गरिरहेको छ भने उसले घुमेको समुदायले पनि पर्यटकबाट त्यस्तै कुरा सिक्न र बुझ्न पाउनुपर्छ भन्ने इन्ट्रपेडको मूल मान्यता छ,’ उनले भने ।

इन्ट्रपेडको यही सिद्धान्त र सिद्धान्त अनुसरणका लागि २०२४ मा लगातार चौथोपटक सर्वाधिक नवप्रवर्तनकारी कम्पनीको अवार्ड जितेको थियो । अवार्डमा मात्र होइन पर्यटकको संख्यामा पनि इन्ट्रपेडले रेकर्ड कायम गरेको छ । सन् २०२३ मा इन्ट्रपेड विश्वभर सर्वाधिक पर्यटक पठाउने ट्राभल कम्पनी बनेको थियो । कोभिड महामारीपछि विश्वमा पर्यटन क्षेत्रलाई ब्युँताउन इन्ट्रपेडले उल्लेखनीय भूमिका निर्वाह गरेको छ ।

नेपालमा भने इन्ट्रपेडले पर्यटनको उत्थानमा मात्र नभएर समुदायकै उत्थानमा पनि महत्वपूर्ण भूमिका निर्वाह गरेको छ । चितवनको माडीका स्थानीय तथा आदिवासीहरुलाई महाभूकम्प तथा कोभिडपछि होमस्टेमार्फत् स्वालम्बी बनाउन डब्ल्यूबब्ल्यूएफ र अस्ट्रेलिया सरकारसँगको सहकार्यमा इन्ट्रपेडले  निरन्तर कार्यक्रमहरु आयोजना गर्दै आएको छ ।

सगरमाथा क्षेत्रमा व्याप्त रहेको फोहोरको समस्याको समाधानमा पनि इन्ट्रपेडले अग्रणी भूमिका निर्वाह गरिरहेको वेडले बताए । इन्ट्रपेडको अग्रसरता र ‘सगरमाथा नेक्स्ट’ नामक संस्थासँगको सहकार्यमा लामो समयदेखि त्यहाँ ‘टेक मि ब्याक’ कार्यक्रम सञ्चालन भइरहेको छ । सो कार्यक्रम अन्तर्गत सगरमाथा आरोहण गर्न गएका तथा बेस क्याम्पमा ट्रेकिङ गर्न गएका स्वदेशी एवं विदेशी पर्यटकहरुले काठमाडौं फर्किदा त्यहाँबाट एक झोला फोहोर फिर्ता ल्याउनै पर्छ । यसले सगरमाथा क्षेत्रमा वर्षौंदेखि व्याप्त रहेको फोहोरको समस्या न्यूनिकरण गर्न धेरै सहयोग गरेको छ ।

इन्ट्रपेडले यसरी विश्वभर दिगोविकास र वातावरणमैत्री नीति लाई अनुसरण गर्दै भ्रमण प्याकेजहरु तयार गर्दै आएको छ । इन्ट्रपेडका दुई संस्थापक वेड तथा जेफ म्यानचेस्टर अहिले विश्वभर रहेका आफ्ना २८ कार्यालयको भ्रमण गरिरहेका छन् । उनीहरु २०३० सम्मका लागि कम्पनीको रणनीति निर्धारण गर्न भ्रमणमा छन् । इन्ट्रपेड २०२३ मा टाइम्स म्यागाजिनको १०० प्रभावशाली कम्पनीहरुको सूचीमा पनि परेको थियो ।