पार्वती बहुमुखी क्याम्पसको ११ औ स्थापना दिवस सम्पन्न 

काठमाडौं, फागुन २३ : बेथानचोक गाउँपालिकामा रहेको पार्वती बहुमुखी क्याम्पसले आफ्नो ११औ स्थापना दिवस विविध कार्यक्रम गरी मनाएको छ । 

गाउँपालिकाका अध्यक्ष भगवान अधिकारीको प्रमुख आतिथ्यतामा भएको कार्यक्रमलाई सम्बोधन गर्दै उहाँले गाउँपालिककाकै गौरवको रुपमा रहेको एकमात्र क्याम्पसले नयाँ वर्षारम्भ गरेकोमा शुभकामना दिए । 

ग्रामीण भेगमा रहेको क्याम्पसका आफ्नै किसिमको समस्या हुने भन्दै त्यसका अलावा, दिनानुदिन विद्यार्थीहरु विदेशिने समस्याले भावी दिनहरुमा चुनौती बढ्ने बताए । उनले शिक्षाले व्यवहारमा परिवर्तन ल्याउनु पर्ने भन्दै  जीवनपयोगी शिक्षा दिन क्याम्पस टिमलाई आग्रह गरे ।

उनले गाउँपालिकाले क्याम्पसका लागि लगानी थप्ने बताउँदै सिकाउने खालको जाँगरिलो पौरखी शिक्षा अबको गन्तव्य हुनु पर्नेमा जोड दिए । दैनिक जीवनमा प्रयोग गर्ने खालको शिक्षाले शिक्षालयको वातावरण, विद्यार्थीको जीवनपद्धति र अनुभवलाई सम्बोधन गर्ने भएकोले आफू पनि क्याम्पससँग सहकार्य गर्न तयार रहेको बनाए ।  

क्याम्पस सञ्चालक समिति अध्यक्ष विनोद तिमल्सिनाको सभापतित्वमा भएको कार्यक्रममा क्याम्पस प्रमुख प्रताप कार्कीले क्याम्पसका गतिविधि र भावी कार्ययोजना प्रस्तुत गरेका थिए ।  

कार्यक्रममा बेथानचोक गाउँपालिका पूर्व अध्यक्ष प्रेम बहादुर तिमल्सिना, प्राध्यापक संघ बागमती प्रदेश सह–संयोजक, सह प्राध्यापक काभ्रे बहुुमुखी क्याम्पसका अध्यापक माधव प्रसाद तिमल्सिना, अग्रज पत्रकार तथा काभ्रे बहुमुखी क्याम्पसका सह प्राध्यापक इश्वरी ओझा,संस्थापक क्याम्पस प्रमुख एवं पार्वती माध्यमिक विद्यालयका प्रधानाध्यापक गोविन्द शर्मा लगायतले क्याम्पसको प्रगतिको शुभकामना व्यक्त गरेका थिए ।