कर्णालीलाई हराउँदै कोशीको विजयी सुरुआत
विराटनगर, फागुन २२: राष्ट्रिय टी–२० क्रिकेट प्रतियोगिता मंगलबारदेखि विराटनगरको बैजनाथपुरस्थित गिरिजाप्रसाद कोइराला क्रिकेट रंगशालामा सुरु भएको छ ।
आज भएको उद्घाटन खेलमा कर्णाली प्रदेशलाई ३८ रनले हराउँदै कोशी प्रदेश टिमले विजयी सुरुआत गरेको छ ।
टस जितेर पहिले ब्याटिङ गरेको कोशी प्रदेशले निर्धारित २० ओभरमा ८ विकेटको क्षतिमा १४० रन जोडेको थियो । कोशीका कप्तान अंकित सुवेदीले सर्वाधिक ४६ रनको योगदान गरे ।
यसैगरी, सुजन थपलियाले ३८, समिर कार्कीले २०, दिपेश कँडेलले १४ रन जोडेका थिए । त्यसपछिका खेलाडिले दोहोरो अंक बनाउन सकेनन् ।
अनुज चनाराले २ विकेट लिए भने प्रकाश जोशी, युनिस ठकुरी, दिवान पुन, दिनेश अधिकारी र दिपेन्द्र रावतले समान १–१ विकेट लिएका थिए ।
१४१ रनको लक्ष्य लिएर मैदान उत्रिएको कर्णाली १८ दशमलव २ ओभरमा अल आउट भयो । उसलीले १०२ मात्रै बनायो । कर्णालीका लागि हिमान्सु सुवेदीले सर्वाधिक ३४ रन जोडे ।
यस्तै, दिनेश अधिकारीले ११, दिवान पुनले १०, कप्तान रविन्द्र शाहीले ९, अर्जुन घर्तीले ७, विपीन रावलले ६, निश्चल रावलले २, प्रकाश जैसी र अर्जुन चनाराले समान १–१ रन लिएका थिए ।
