अर्थतन्त्र सकारात्मक दिशातर्फ उन्मुख : अर्थमन्त्री महत

काठमाडाैं, फागुन १ : अर्थमन्त्री डा. प्रकाशशरण महतले अर्थतन्त्र सकारात्मक दिशातर्फ उन्मुख रहेको बताएका छन्।

१३औँ विश्व रेडियो दिवसको अवसरमा सामुदायिक रेडियो प्रसारक संघ (अकोराब) ले मंगलबार ललितपुरमा आयोजना गरेको कार्यक्रममा अर्थमन्त्री महतले राजस्व बढेको, आर्थिक गतिविधी चलाउनमान भएको भन्दै अर्थतन्त्र सकारात्मक दिशातर्फ उन्मुख रहेको बताएका हुन्।

उनले आवश्यकता हेरेर लक्ष्य निर्धारण गरे पनि बिभिन्न शीर्षकमा अपर्याप्त रहेको धारणा राखे। स्रोतबिना यसअघि सरकारले गरेका बिभिन्न योजना र कार्यक्रममा ल्याएकाले स्रोत व्यवस्थापन गर्न कठिन भएको उनले बताए।

मन्त्री महतले आगामी दिनमा राजस्व र आन्तरिक तथा बाह्य लगानी वढ्ने विश्वास व्यक्त गरे। मन्त्री महतले रेडियोलाई रोयल्टीको जरिवाना वापतको रकम छुट दिनका लागि निर्णय भइसकेको बताए। ‘रेडियो सूचना शिक्षा र मनोरञ्जनको एक शताब्दी’ भन्ने नाराका साथ विश्व रेडियो दिवस मनाइएको हो।