चितवनमा बस स्कुटरलाई ठक्कर दिँदा एकको मृत्यु

भरतपुर,चैत १ :  पूर्वी चितवनको भण्डारामा बसले स्कुटरलाई ठक्कर दिँदा एकको मृत्यु भएको छ। अर्का एक जना घाइते भएका छन्। 

राप्ती नगरपालिका–७ वीरेन्द्रनगरमा नारायणगढबाट वीरगञ्जतर्फ जाँदै गरेको प्रदेश १–०१००१ ख ३४६४ नम्बरको यात्रुबाहक बसले विपरीत दिशाबाट आउँदै गरेको प्रदेश ३–०२०१४ प १४४६ नम्बरको स्कुटरलाई गएराति ठक्कर दिएको थियो।

ठक्करबाट गम्भीर घाइते भएका बाराको पर्वानीपुर नगरपालिका–२ बस्ने २३ वर्षीय राजीव ठाकुरको उपचारका क्रममा पुरानो मेडिकल कलेजमा मृत्यु भएको जिल्ला प्रहरी कार्यालय चितवनका प्रवक्ता एवं प्रहरी नायब उपरीक्षक एकनारायण कोइरालाले जानकारी दिए।

ठक्करबाट घाइते भएका स्कुटर चालक भरतपुर महानगरपालिका–१० का २२ वर्षीय श्रीसव देवकोटाको पुरानो मेडिकल कलेजमा उपचार भइरहेको प्रहरीले जनाएको छ। स्कुटरलाई ठक्कर दिने बस र चालकलाई भने प्रहरीले नियन्त्रणमा लिएको छ।