बिहीबार, असार २५, २०७७

विश्वभर कोरोना भाइरसबाट ३ लाख ६१ हजार वढीको मृत्यु 

काठमाडौं, जेठ १६ :  विश्वभर कोरोना महामारीका कारण मृत्यु हुनेको संख्या ३ लाख ६१ हजार नाघेको छ । ५९ लाख संक्रमित मध्ये २५ लाख ७७ हजार उपचार पछि निको भएका छन् ।

५२ हजार ८ सय संक्रमितको अबस्था गम्भिर छ भने बाँकीको अवस्था मध्यम रहेको छ । पछिल्लो तत्थ्यांक अनुसार अमेरिकामा कोरोना संक्रमणका कारण मृत्यु हुनेको संख्या १ लाख ३ हजार नाघेको छ । संक्रमितको संख्या १७ लाख ६८ हजार रहेको छ । बेलायतमा २ लाख ६९ हजार संक्रमित मध्ये ३७ हजार ८ सय बढीको मृत्यु भएको छ ।

इटालीमा २ लाख ३१ हजार ७ सय संक्रमितमध्ये ३३ हजार बढीको मृत्यु भएको छ । फ्रान्समा १ लाख ८६ हजार २ सय बढी संक्रमित हुंदा मृत्यु हुनेको संख्या २८ हजार ६ सय नाघेको छ । ब्राजिलमा ४ लाख ३८ हजार ८ सय बढी संक्रमित हुंदा करिब २७ हजारको मृत्यु भएको छ । जर्मनीमा १ लाख ८२ हजार बढी संक्रमित र ८ हजार ५ सयको मृत्यु भएको छ ।

चीनमा ८२ हजार ९ सय ९२ कोरोना संक्रमित हुंदा मृत्यु हुनेको संख्या ४ हजार ६ सय ३४ पुगेको छ । रसियामा ३ लाख ७९ हजार बढी संक्रमितमा मृत्यु हुनेको संख्या ४ हजार नाघेको छ ।

यसैगरी भारतमा कोरोना संक्रमितको संख्या १ लाख ६५ हजार नाघ्दा ४ हजार ७ सय बढीको मृत्यु भएको छ ।

 Published Date: Friday, 29th May 07:39:14 AM