शुक्रबार, असोज १६, २०७७

भ्रमण वर्ष लक्षित ‘गाइडबुक’ र ‘ब्रोसर’ प्रकाशन

काठमाडौं, मंसिर २४ : ‘नेपाल भ्रमण वर्ष सन् २०२०’ नजिकिँदै गर्दा पनौतीलाई चिनाउने खालको तयारी अभियान शुरु गरिएको छ ।

‘भिजिट नेपाल २०२०’ मा धेरैभन्दा धेरै पर्यटकलाई काभ्रेपलाञ्चोकको पनौती नगरपालिकामा भित्र्याउन नगरपालिकाले विभिन्न योजना ल्याउने तयारी थालिसकेको पनौती पर्यटन विकास समितिले जनाएको छ । पर्यटन विकास समितिको आयोजनामा भएको बैठकमा पर्यटन वर्ष केन्द्रित पनौतीको चिनारीसहितको ब्रोसर र पर्यटन गाइडबुक निकाल्ने तयारीमा नगरपालिका योजनाका साथ अगाडि बढेको जानकारी दिइएको हो ।

नगर भ्रमणका लागि आउने पर्यटकले पनौतीको सांस्कृतिक सम्पदा, ऐतिहासिक, धार्मिक, भौगोलिक वातावरणीय अवस्थासहित त्यहाँका सबैखाले सम्भावना रहेको विषयमा उक्त गाइडबुक र ब्रोसरबाट धेरै जानकारी लिन सकिनेगरी निकाल्ने तयारीमा रहेको नगरप्रमुख भीम न्यौपानेले बताए । पनौती पर्यटन विकास समितिका संयोजक एवं वडा नं २ का अध्यक्ष पुरुषोत्तम अधिकारीले यही महिनाको अन्तिमसम्ममा ती सामग्री तयार भइसक्ने जानकारी दिए ।

“नगरपालिकाले नगरभित्रका सबै वडामा रहेको पर्यटन सम्भावित क्षेत्र वा भूगोलको पहिचान गरी गाइडबुक र पनौतीको चिनारी ब्रोसरमा समेट्ने गरी आवश्यक तयारी गर्दैछौँ”, उनले भने, “जसले गर्दा पर्यटकले एउटा गाइडबुक वा ब्रोसर अध्ययन गरेकै भरमा पनौतीको बारेमा सबै जानकारी लिन सकोस् ।”

गाइडबुकमा सकेसम्मको जानकारी सङ्कलन गरेर समेट्ने तयारीमा रहेको र यसै महिनाको अन्त्यसम्ममा ब्रोसर र गाइडबुकमा पनौतीमा प्याराग्याइडिङ, पदमार्ग, साइक्लिङ, हाइकिङलगायत पर्यटन सूचना केन्द्र तथा नगरभित्र सञ्चालनमा रहेका विभिन्न जात्रा, सांकृतिक सम्पदाका बारेमा जानकारी दिनेलगायतका जानकारीमूलक सन्देश समावेश हुने समितिले जनाएको छ ।
 

 Published Date: Tuesday, 10th December 2019 2:17:56 am