बुधबार, मंसिर २५, २०७६

पहिरोले सडक भासिँदा यातायात ठप्प, ८ परिवारले छाडे घर 

बाजुरा, साउन २७ : साँफे मार्तडी सडकमा पहिरा जाँदा यातायात सेवा ठप्प भएको छ। बूढीगङ्गा नदीले सडक नै कटान गरी भासिन थालेपछि यातायात सेवा ठप्प हुन पुगेको हो।

शिलान्यास भएको २३ वर्षपछि निर्माण सम्पन्न भएर यातायात सेवा सञ्चालन भएको एक वर्ष नपुग्दै दर्जनाैं स्थानमा पहिरा जाँदा सो सडक अवरुद्ध भएपछि  बाजुरावासी प्रभावित भएका छन्। गत वर्ष मात्र कालोपत्रको काम सकिएर सो सडक नियमित सञ्चालनमा आएको थियो।

कालोपत्र गरेकै वर्ष पनि पहिराका कारण सडक अवरुद्ध बनेको थियो। यो वर्ष पनि दुई पटक अवरुद्ध बनिसकेको छ। सामान्य पहिरा गएको र पन्छाएपछि पुनः सञ्चालन हुने अवस्था नभएकाले लामो समयसम्म सडक बन्द हुने अवस्था देखिएको छ।
    
सो सडकखण्डअन्तर्गत बूढीगङ्गा नगरपालिका– १ अमकोट क्षेत्रमा पहिराले सडक भत्किएको छ। सडकमा यातायातका साधन नै सञ्चालन गर्न नमिल्ने गरी सडक भासिएको प्रहरीले जनाएको छ। सडक नै भासिएकाले छिटो खुलाउन नसकिने सडक डिभिजन कार्यालय साँफेका इञ्जिनीयर दमन विष्टले बताए। 

“यसअघि सानातिना दर्जन बढी पहिरा जाँदा समयमै खुलाउन सकिएको थियो”, उनले भने, “यो पहिराको प्रकृति हेर्दा पहिरो खुलाउन सहज छैन, पहिरा पन्छाउनका लागि निकै सकस हुने अवस्था छ।”

सडकको आधा बढी भाग पहिराले बगाइसकेको र बाँकी भाग पनि भत्किने खतरा रहेकाले बस र ठूला मालबाहक ट्रक आवतजावतमा रोक नै लगाइएको जिल्ला प्रहरी कार्यालयले बताएको छ। पहिराले भासिएको क्षेत्रमा खतराको चिह्न लगाएर प्रहरी परिचालन गरिएको छ। 
    
सो क्षेत्रको अम्कोट र द्वारी तथा मलाती क्षेत्रका आधा किलोमिटर बढी सडक नै पहिराको उच्च जोखिममा रहेको सडक डिभिजन कार्यालय साँफेबगरले जनाएको छ। त्रिवेणी नगरपालिका क्षेत्रमा पर्ने पैमाको पहिरा र बूढीगङ्गा नदीको कटानले सडक नै उच्च जोखिममा रहेको इञ्जिनीयर दमन विष्टको भनाइ छ। 
    
“बाटो पूरै भत्किसकेकाले अहिले सवारी साधन सञ्चालन गर्ने अवस्था छैन्”, उनले भने,'पहिराको कारण करिब ६० मिटर सड़क भासिएकाले सड़क पूर्णरूपमा अवरुद्ध भएको छ, बाटोका लागि विकल्प खोजिए पनि तत्काल सञ्चालन गर्नसक्ने अवस्था छैन्।”
    
सडक छेउको घर नै भत्काएर तत्कालका लागि वैकल्पिक बाटो निर्माण गर्नुपर्ने हुँदा यसका लागि प्रमुख जिल्ला अधिकारीसहित घरधनीको अनुमति चाहिने इञ्जिनीयर विष्टले जानकारी दिए। 
    
उनले भने,“बजेट नभएपनि पछि माग गरेर पूर्ति गर्ने गरी वैकल्पिक सडक बनाइने छ। सडक अवरुद्ध हुँदा सदरमुकाम मार्तडी आउने र मार्तडीबाट जाने मालवाहक तथा यात्रुवाहक सवारी अलपत्र परेका छन् । दर्जर्नौ सवारी साधान बल्देमै रोकिएका छन्।” सदरमुकाम मार्तडी आउने र मार्तडीबाट जाने सञ्जाल नै विच्छेद भएको स्थानीयवासी चेतन ऐडीले बताए। 

आठ परिवारले घर छोडे 

साँफे मार्तडी सडक खण्डको छेउमा रहेका आठ परिवारले घर छोडेका छन्। तलपट्टी बूढीगङ्गा नदीको तीव्र कटान शुरु गरेसँगै आँगनमै पहिरा बग्न थालेपछि उनीहरुले घर छोडेका हुन्।

सात परिवारले साउन पहिलो साता नै घर छोडेका हुन् भने टीकाराम पाध्यायका दाजुभाइले एकहप्ता अघिमात्रै घर छोडेको स्थानीयवासी नवराज पाध्यायले जानकारी दिए। निरन्तर वर्षाका कारण सडक पहिराले भाँसिएसँगै घर पनि जोखिममा परेको छ। घरसमेत पहिरामा बग्ने भएपछि घर छोडेर अन्यन्त्र सर्नु परेको टीकाराम पाध्यायको परिवारको गुनासो छ। 
    
सडक तलतिर रहेका लीला पाध्याय, हीरा पाध्याय, नन्दकृष्ण पाध्याय, मनिराम पाध्याय, टीकाराम पाध्याय लगायतका परिवार पनि अन्यन्त्र सरिसकेका छन्। उनीहरुको बस्ती नजिकै पहिरा बग्न थालेको छ। 

 Published Date: Monday, 12th August 20:07:45 PM