बिहीबार, असार २५, २०७७

बूढानीलकण्ठका दुई संक्रमित कोरोना जितेर घर फर्किए

काठमाडौं, जेठ १८ : काठमाडौंको बूढानीलकण्ठ नगरपालिकाका दुई जना व्यक्ति कोरोना जितेर घर फर्किएका छन्। सर्लाही, रामनगर स्थायी घर भई हाल बूढानीलकण्ठ–१२ स्थित तेञ्जिङ चोकमा बसोबास गर्ने एक १८ वर्षीया युवती र बूढानीलकण्ठ–३ स्थायी घर भएका ३७ वर्षीय पुरुष कोरोना जितेर घर फर्किएका हुन्।

यही जेठ ३ गते गरिएको परीक्षणमा पीसीआर रिपोर्ट पोजिटिभ देखिएपछि युवतीलाई शुक्रराज ट्रपिकल तथा सरुवारोग अस्पताल टेकुको आइसोलेशनमा राखिएको थियो। लगातार तीनचार पटकसम्मको परीक्षणमा नेगेटिभ रिपोर्ट आएपछि उलाई डिस्चाजै गरिएको नगरपालिकाका स्वास्थ्य शाखा प्रमुख कुमार दाहालले बताए। युवती १५ दिनको उपचारपछि घर फर्किएकी हुन्।

यस्तै बूढानीलकण्ठ–३ स्थायी घर भएका ३७ वर्षीय पुरुषलाई जेठ १२ गते कोभिड–१९ पुष्टि भएपछि शुक्रराज ट्रपिकल तथा सरुवारोग अस्पताल टेकुको आइसोलेसनमा राखिएको थियो। उनको लगातार दुई पटकसम्मको परीक्षणमा रिपोर्ट नेगेटिभ आएपछि पाँच दिनमा घर फर्काइएको छ।

युवकमा कोरोना पुष्टि भएसँगै बूढानीलकण्ठ  –३ स्थित बूढानीलकण्ठ मन्दिर तथा शिवपुरी राष्ट्रिय निकुञ्ज क्षेत्र आसपास सिल गरिएको थियो । युवक कोरोना नेगेटिभ भई घर फर्किएपछि उक्त क्षेत्र आजदेखि खुला गरिएको वडाध्यक्ष बालकृष्ण श्रेष्ठले जानकारी दिए।

 Published Date: Sunday, 31st May 12:11:58 PM