सोमबार, चैत्र २४, २०७६

स्ववियु निर्वाचन निर्धारित मितिमै गराउन माग

लहान, माघ २२ : राष्ट्रिय जनता पार्टी (राजपा) निकट राष्ट्रिय विद्यार्थी सङ्घले फागुन १४ कै मितिमा स्वतन्त्र विद्यार्थी युनियनको निर्वाचन गर्न माग गरेको छ ।

सङ्गठनका केन्द्रीय अध्यक्ष किशोरकुमार यादवले आज लहानमा सञ्चारकर्मीसँग कुराकानी गर्दै विद्यार्थी राजनीतिसँग जोडिएको स्ववियु निर्वाचन तोकिएकै मितिमा हुनपर्ने बताए ।  स्ववियु निर्वाचन सार्ने षडयन्त्र भइरहेको भन्दै अध्यक्ष यादवले निर्धारित मितिमा निर्वाचन नभए आफ्नो सङ्गठन आन्दोलनमा जाने बताए ।

देशमा सबै तहको चुनाव सम्पन्न भइसकेको अवस्थामा विद्यार्थीको निर्वाचन रोक्नु उपयुक्त नहुने भन्दै स्ववियु निर्वाचनमा जुट्न सबै विद्यार्थी सङ्गठनसँग उनले आग्रहसमेत गरे ।

पछिल्लो एक दशकयता स्ववियु निर्वाचन नगराउँदा विद्यार्थी राजनीतिको लागि दुर्भाग्य र दुःखद भएको भन्दै अध्यक्ष यादवले विद्यार्थीबीचमा नेतृत्व सिक्ने र सिकाइने थलोका रुपमा रहेको स्ववियु निर्वाचन निर्धारित समयमा गराउनु आवश्यक रहेको जिकिर गरे ।

गत पुस २३ गते नै त्रिभुवन विश्वविद्यालय मातहतका सबै आङ्गिक क्याम्पसमा स्ववियु चुनाव गर्न त्रिविले परिपत्र गरिसकेको अवस्थामा अहिलेसम्म विद्यार्थी सङ्गठनलाई बोलाएर यसबारेमा कुनै छलफलसमेत नगरिएको स्पष्ट पारेकाे छ ।

 Published Date: Tuesday, 5th February 15:06:06 PM