बिहीबार, असार १८, २०७७

गाउँसभा बैठकमा पनि ‘हुन्छ भन्नेले हुन्छ भन्नुहोस्’

चितवन, पुस २९ : सङ्घीय संसद् बैठक सञ्चालनको शैलीमा चितवनको एकमात्र गाउँपालिका  इच्छाकामना गाउँपालिकाले गाउँँसभा बैठक आयोजना गरेको छ।

सोमबार दिउँसो २ बज्न लागेको थियो। बैठक कक्षमा राष्ट्रिय धुन बज्दा सबै आ–आफ्नो आसनबाट उठे। यसपछि बैठक प्रारम्भ भयो।

गाउँपालिका उपाध्यक्ष कृतिकुमार श्रेष्ठलाई गाउँपालिका अध्यक्ष तथा गाउँसभाध्यक्ष गीताकुमारी गुरुङले संशोधित आर्थिक विधेयक २०७६ सभामा प्रस्तुत गर्न अनुमति दिइन्।

विधेयकलाई गाउँपालिका सदस्य बलराम त्रिपाठीले समर्थन जनाए। विधेयकमाथि केही सदस्यले आफ्नो धारणा तथा सुझाव राखे।

अध्यक्ष गुरुङले विधेयकलाई निर्णयार्थ प्रस्तुत गर्दै विधेयक पक्षमा ‘हुन्छ भन्नेले हुन्छ भन्नुहोस्,’ विधेयकको विपक्षमा ‘हुन्न भन्नेले हुन्न भन्नुहोस्’ भने। सदस्यले हात उठाएर ‘हुन्छ’ भने।

सबैले हात उठाएर सहमति जनाएपछि गाउँसभाध्यक्ष  गुरुङले  ‘हुन्न भन्ने आवाज नआएकाले विधेयक सम्मानित सभाबाट पास भएको घोषणा’ गरिन्। सबै सदस्यले ताली बजाइ विधेयक पारित गरियो।

यसैबीच अन्य विधेयक सम्बन्धित विषयका संयोजकबाट क्रमशः प्रस्तुत भए। ती विधेयकलाई क्रमशः सोही प्रक्रियामा अघि बढाइयो।

गाउँपालिकामा व्यवस्थापिका संसद्कै शैलीमा गाउँसभा बैठक आयोजना गरिएको हो। प्रस्तुत विधेयकबारे छलफल गर्न चाहने सदस्यलाई तीन मिनेटको समय प्रदान गरिएको थियो। प्रस्तुत विधेयकमाथि सदस्यले उठाएको प्रश्नको जवाफ सम्बन्धित विषयका संयोजकले दिएका थिए।

कतिपय बोल्ने सदस्यले सभाध्यक्षलाई ‘सभामुख’ भनेर सम्बोधनसमेत गरेका थिए। त्यतिवेला भने सबै हाँस्ने गरेका थिए।

प्रशासकीय अधिकृत सुकदेव लम्सालका अनुसार गाउँसभामा सोमबार संशोधित आर्थिक विधेयक २०७६, सहकारी विधेयक, संशोधित विनियोजन विधेयक २०७६, भवन निर्माणसम्बन्धी विधेयक, स्वास्थ्य संस्था दर्ता सञ्चालन तथा नियमन विधेयक २०७६, न्यायिक समितिसम्बन्धी विधेयक २०७६ गरी ६ वटा विधेयक प्रस्तुत भएका छन्। प्रस्तुत विधेयकको सोमबारदेखि नै दफाबार छलफल शुरु भएको छ।  

झण्डै तीन घन्टा बसेर गाउँसभाको बैठक सभाध्यक्ष तथा  गाउँपालिका अध्यक्ष गुरुङले स्थगित गरिन्। उनले आगामी बैठक माघ २० गते बस्ने जानकारी दिइन। गाउँसभामा गाउँसभा सदस्यबाहेक पत्रकार र कर्मचारीलाई मात्र प्रवेशको अनुमति थियो। (रासस)

 Published Date: Tuesday, 14th January 10:46:23 AM