पाकिस्तानी प्रधानमन्त्रीले सम्झिए क्रिकेटर छँदा गरेको नेपाल भ्रमण
पाकिस्तानका प्रधानमन्त्री इमरान खानले राजनीतिमा लाग्नुअघि आफूले गरेको नेपालको व्यक्तिगत भ्रमण स्मरण गरेका छन्।काठमाडौं, असोज ६ : पाकिस्तानका प्रधानमन्त्री इमरान खानले राजनीतिमा लाग्नुअघि आफूले गरेको नेपालको व्यक्तिगत भ्रमण स्मरण गरेका छन् । राजनीतिमा लाग्नुअघि उनी क्रिकेटर थिए ।
पाकिस्तानका लागि नेपालका राजदूत तापस अधिकारीसँग बुधबार इस्लामावादस्थित प्रधानमन्त्री कार्यालयमा भएको भेटमा खानले आफ्नो नेपाल भ्रमण स्मरण गरेका हुन् । र, नेपाल र पाकिस्तानबीचको द्विपक्षीय सम्बन्धलाई अझ बढावा दिन नेपाल सरकारसँग मिलेर काम गर्न इच्छुक भएको उनले बताए ।
प्रधानमन्त्री शेरबहादुर देउवा र नेपाली जनताको व्यक्तिगत स्वास्थ्य, खुशी, निरन्तर प्रगती एवं समृद्धिका लागि खानले शुभकामना पनि व्यक्त गरेका थिए ।
शिष्टाचार भेटमा राजदूत अधिकारीले कोभिड-१९ महामारीविरुद्ध लड्न नेपाललाई पाकिस्तानले उपलब्ध गराएको सहयोगका लागि प्रधानमन्त्री खान र पाकिस्तान सरकारको सराहना गरेका थिए । दुई मुलुकबीचको सम्बन्ध सदभावना, आपसी विश्वास र सहयोगमा आधारित रहेको उनले बताए । र, नेपाल र पाकिस्तान दक्षिण एसियाली क्षेत्रीय सहयोग संगठन (सार्क)का संस्थापक सदस्य रहेको तथा संयुक्त राष्ट्रसंघलगायत अन्तर्राष्ट्रिय मञ्चहरूमा समान विचार राख्ने गरेको राजदूत अधिकारीले स्मरण गरे ।
नेपाल र पाकिस्तानबीच सांस्कृतिक र साहसिक पर्यटन आदानप्रदानको प्रचुरताबारे भेटमा छलफल भएको नेपाली दूतावासले जनाएको छ