काठमाडौंका सांस्कृतिक सम्पदालाई पर्यटनसँग जोड्ने अभियान जारी : मेयर शाक्य

काठमाडौं, असोज २ : काठमाडौं महानगरपालिकाका प्रमुख विद्यासुन्दर शाक्यले काठमाडौंमा भएका सम्पदाको संरक्षण तथा सम्वर्द्धन गर्ने र तिनलाई पर्यटनसँग जोड्ने अभियान जारी रहेको बताएका छन्।

शाक्यले आज (शनिबार) वडा २१ को इनाखामा गणेश मन्दिर उद्घाटन गर्दै उनले भने, ‘काठमाडौंका ऐतिहासिक सम्पदालाई धार्मिक पर्यटकीय सहरको पहिचान दिने अभियानमा महानगर लागेको छ।’ मेयर शाक्यको निवास पनि वडा २१ मै पर्छ।

उनले वडा २१ मात्र नभएर सबै वडामा सम्पदा निर्माण तथा पुनर्निर्माणलाई महानगरले प्राथमिकता दिँदै आएको बताए। उनले संस्कृतिको संरक्षण भएकै कारण महानगरले सांस्कृतिक सहरको पहिचान बनाएको बताए। ‘त्यसकारण यो पहिचनालाई जीवन्त राख्न महानगर प्रयासरत छ, रहिरहन्छ,’ उनले भने।

काठमाडौं मन्दिरै मन्दिरको महानगरपालिका भएको पनि उनले बताए। ‘यहाँ घरबाट बाहिर निस्किनेबित्तिकै मन्दिर नै मन्दिर भेटिन्छ,’ उनले भने, ‘तर नजिकैको मन्दिर छाडेर बाहिरका मन्दिरको दर्शनका लागि बर्सेनि लाखौं काठमाडौंवासीले धार्मिक यात्रा गर्ने गरेका छन्।’

उनले काठमाडौंलाई धार्मिक ऐतिहासिक महत्वबारे अध्ययन-अनुसन्धान गर्ने थलो बनाउने, पर्यटकीय स्थलका रूपमा काठमाडौंलाई विकास गर्ने पनि बताए।

काठमाडौं घुम्न आउने पर्यटकको बसाइ म्ब्याउने योजना पनिअघि बढिरहेको उनले बताए। ‘स्थानीयसँगै अन्य व्यवसायीको जीवनयापन थप सहज बनाउन यहाँका सम्पदालाई पर्यटनसँग जोड्न हामी चाहिरहेका छौं।’

गुठी संस्थानसँग रहेका मठमन्दिर र जग्गा महानगरपालिकालाई दिएको खण्डमा खुलापार्क र सम्पदा निर्माणको कामलाई अघि बढाउँदै ऐतिहासिक सहरको पहिचानलाई थप बलियो बताउने विश्वास पनि उनले दिलाए।

 Published Date: Saturday, 18th September 2021 3:30:00 pm