Kathmandu Press

हेटौंडा अस्पतालमा स्वास्थ्यकर्मीमाथि हातपात, कारबाहीको माग

हेटौंडा, भदौ ३१ : मदन भण्डारी स्वास्थ्य विज्ञान प्रतिष्ठानद्वारा सञ्चालित हेटौंडा अस्पतालमा स्वास्थ्यकर्मीमाथि हातपात भएको छ। हेटौंडा अस्पतालमा कार्यरत एक स्वास्थ्यकर्मीमाथि बुधबार राति बिरामीका आफन्तले...
हेटौंडा अस्पतालमा स्वास्थ्यकर्मीमाथि हातपात, कारबाहीको माग

हेटौंडा, भदौ ३१ : मदन भण्डारी स्वास्थ्य विज्ञान प्रतिष्ठानद्वारा सञ्चालित हेटौंडा अस्पतालमा स्वास्थ्यकर्मीमाथि हातपात भएको छ। 

हेटौंडा अस्पतालमा कार्यरत एक स्वास्थ्यकर्मीमाथि बुधबार राति बिरामीका आफन्तले हातपात गरेका हुन्। केही व्यक्तिले आक्रमण गर्दा एक प्रशिक्षार्थी स्वास्थ्यकर्मी घाइते भएको मदन भण्डारी स्वास्थ्य विज्ञान प्रतिष्ठान हेटौंडा अस्पतालले जनाएको छ।

प्रतिष्ठानका अनुसार दुर्घटनामा परी घाइते भएका एक व्यक्तिलाई उपचारका लागि हेटौंडा अस्पताल लगिएको थियो। उपचारका लागि कारमा आएका ती घाइते व्यक्तिलाई अस्पतालको आकस्मिक कक्षसम्म पुर्‍याउन स्टेचर नभएको भन्दै उनका आफन्तले फलामको कुर्सीले स्वास्थ्यकर्मीलाई प्रहार गरेको हो।

कुर्सी प्रहारबाट अस्पतालमा कार्यरत प्रशिक्षार्थी स्वास्थ्यकर्मी समृद्धि श्रेष्ठको खुट्टामा चोट लागेको अस्पतालले जनाएको छ।

अस्पतालका अनुसार २० वर्षीय श्रेष्ठ अध्ययनपश्चात प्रशिक्षणका लागि हेटौंडा अस्पतालमा आएका थिए। उक्त घटनापछि आक्रोशित बिरामीका आफन्तले बिरामीलाई तत्काल हेटौंडा-११ थाना भर्याङस्थित चुरेहिल अस्पतालमा लगेको जनाइएको छ।

कोरोना सङ्क्रमणको जोखिम कायमै रहेको बेला रातको समयमा स्वास्थ्यकर्मीमाथि भएको आक्रमणको विरोध गर्दै आवश्यक कारबाही प्रक्रिया अघि बढाउन हेटौंडा अस्पतालले प्रहरीसमक्ष मौखिक जानकारी दिएको अस्पताल विकास तथा व्यवस्थापन समितिका अध्यक्ष राजेश प्रसाईंले जानकारी दिए।

उनले  सिसीटिभी फुटेज र आवश्यक प्रमाणसहित बिहीबार प्रहरीसमक्ष लिखित उजुरी दिएर कारबाही प्रक्रिया अघि बढाउने तयारी भइरहेको जानकारी दिए। 

प्रकाशित मिति: १४:१० बजे, बिहीबार, भदौ ३१, २०७८
NTCNTC
Globle IME bankGloble IME bank
प्रतिक्रिया दिनुहोस्