विराटनगरको सभामा प्रधानमन्त्री ओलीले नसुनाएको ‘नयाँ सूचना’

काठमाडौं, फागुन ८ : आफू नेतृत्वको नेकपाले विराटनगरमा आयोजना गरेको सभामा सहभागी हुन प्रधानमन्त्री केपी ओली शनिबार विमानस्थलमा उत्रेर सभास्थलतर्फ जाने क्रममा थिए । त्यतिबेला सभालाई सम्बोधन गर्दै गरेका नेकपा नेता तथा संविधानसभाका पूर्वअध्यक्ष सुवास नेम्बाङले भनेका थिए- ‘विराटनगर विमानस्थलमा प्रधानमन्त्रीको अनुहार उज्यालो देखेँ, उहाँ यो सभामा केही नयाँ सूचना दिँदै हुनु हुन्छ ।’ त्यसअघि पूर्वसञ्चारमन्त्री गोकुल बाँस्कोटाले बिहान ७ः४७ मा ट्विट गरेका थिए- ‘आज के हुन्छ ? पक्कै केही नयाँ !’

त्यस्तो नयाँ के होला ? जिज्ञासा स्वाभाविक थियो । पूर्वकानूनमन्त्री शेरबहादुर तामाङ र उनकी पत्नी तथा प्रदेश–१ प्रदेशसभा सदस्य उषाकला राई पुनः ओली समूहमै फर्केको समाचारले केही नयाँपन दियो । तर, नेम्बाङले प्रधानमन्त्रीबाटै नयाँ सूचना आउँदै गरेको घोषणा सभामा गरे ।

नेम्बाङपछि गृहमन्त्री रामबहादुर थापा ‘बादल’ले सभालाई सम्बोधन गरे । र, त्यसपछि पालो आयो, प्रधानमन्त्री ओलीको । उनले त्यस्तो कुनै सूचना सुनाएनन्, जसमा नेम्बाङले जोड दिएका थिए ।

गृहमन्त्री थापाले सम्बोधन गर्दै गर्दा नेम्बाङ प्रधानमन्त्रीतिर लम्केर केही भन्दै थिए, प्रधानमन्त्री ओली सम्बोधन गर्न अगाडि बढ्दै गर्दा पनि नेम्बाङ केही भन्दै थिए । तर, नेम्बाङले जोड दिएको भनेर उनले कुनै सूचना सुनाएनन् ।

सायद त्यो सूचना सभामुख अग्निप्रसाद सापकोटा र उपराष्ट्रपति नन्दकिशोर पुनतिर लक्षित थियो । सभालाई सम्बोधन गर्दै प्रधानमन्त्री ओलीले सभामुखले अदालतमा किर्ते सनाखत गरेको दाबी गरे । ‘उहाँले किर्ते सनाखत गर्नुभएको छ, साढे तीन बजे गर्न नदिएको कुरालाई साढे १० बजे ल्याएका थिए भनेर भन्नुभएको छ,’ ओलीले भने ।

त्यसपछि उनी उपराष्ट्रपति पुनतिर सोझिए र उनी सरकारविरुद्ध भाषण गर्दै हिँडेको आरोप लगाए । पार्टी एकढिक्का छँदै आफूले प्रतिनिधिसभा विघटन सिफारिस गरेको दाबी ओलीले गरे ।

शेरबहादुर तामाङ र उषाकला राई पुनः आफ्नो समूहमा फर्केको सुनाउन प्रधानमन्त्रीले छुटाएनन् ।