रुसी विपक्षी नेता नाभाल्नीलाई तत्काल रिहाइ नगरिने    

मस्को– रूसी प्रशासनिक केन्द्र क्रेमलिनले विपक्षी नेता नाभाल्नीको रिहाइका लागि अन्तर्राष्ट्रिय समुदायले गरेको आग्रहलाई अस्वीकार गरेको छ । मस्कोले नाभाल्नीले विशाल विरोधका लागि गरेको आह्वान राष्ट्रको हितमा नभएको भन्दै उनलाई तत्काल रिहा गर्न नसकिने बताएको हो ।     

राष्ट्रपतिका प्रवक्ता डिमित्री पेस्कोभले मस्कोमा सञ्चारकर्मीसँगको कुराकानीमा भने, ‘हामीले आन्दोलनका लागि विपक्षी नेताले गरेका आह्वानहरूलाई सुनेका छौं । यसलाई वेवास्ता गर्न सक्दैनौं ।’ नाभाल्नी जर्मनीमा रहेर उपचार गरी करिब पाँच महिनापछि आइतबार मस्को फर्केपछि क्रेमलिनले दिएको यो पहिलो प्रतिक्रिया हो ।     

गत अगस्टमा रूसकै ओम्स्कबाट मस्को जाने विमानमा रहेको समयमा अकस्मात् बिरामी परेका नाभाल्नीलाई आकस्मिक अवतरण गराई स्थानीय एक अस्पतालमा उपचार गरिएको थियो ।   उनलाई जर्मनीको अनुरोधमा आन्तरिक विमानमार्फत् उपचारका लागि बर्लिन लगिएको थियो । जर्मनीमा डाक्टरहरूले नाभाल्नीलाई विष दिइएको कुराको पुष्टि गरेका थिए । उनलाई अस्पतालबाट सेप्टेम्बरमा डिस्चार्ज गरिएको थियो तर चिकित्सकको सल्लाह अनुसार त्यहीँ आराम गरिरहेका थिए ।
     
फ्रान्सेली र स्विडेनी प्रयोगशालामा गरिएको परीक्षणमा नाभाल्नीलाई बेहोस बनाउने सोभियतकालीन रसायन ‘नोभिचोक’ खानामा मिसाएर खुवाइएको हुन सक्ने रिपोर्ट जर्मनीले दिएको छ ।