विनोद भण्डारीको शतकमा आर्मीको सानदार जित
'प्रधानमन्त्री कप एकदिवसीय क्रिकेट प्रतियोगिता'काे उद्घाटन खेलमा विनोदको शतक मद्दतमा आर्मीले गण्डकी प्रदेशमाथि ९९ रनको फराकिलो जित निकालेको हो ।नेपाली राष्ट्रिष्य क्रिकेट टिमका सदस्य विनोद भण्डारीले शतकीय इनिङ खेलेपछि 'प्रधानमन्त्री कप एकदिवसीय क्रिकेट प्रतियोगिता'मा त्रिभुवन आर्मी क्लबले सानदार जित निकालेको छ । आजैबाट सुरु भएको प्रतियोगिताको उद्घाटन खेलमा विनोदको शतक मद्दतमा आर्मीले गण्डकी प्रदेशमाथि ९९ रनको फराकिलो जित निकालेको हो ।
कीर्तिपुरस्थित टियू मैदानमा भएको खेलमा पहिला ब्याटिङ गर्दै आर्मीले दिएको २८८ रनको लक्ष्य पछ्याएको गण्डकी प्रदेश ४८ ओभरमा १८९ रनमै अलआउट भयो । उसका लागि समीर कँडेलले सर्वाधिक ५० रन बनाए भने कप्तान विपिन खत्रीले ३७ र अर्जुन कुमालले ३६ रनको योगदान दिए ।
गण्डकी प्रदेशलाई सस्तैमा समेट्ने क्रममा राजेश पुलामी मगरले ५ विकेट लिए । उनले ९ ओभरमा २ मेडनसहित २५ रन खर्चिए । यस्तै भीम सार्कीले ३ तथा आकाश चन्द र रोहित पौडेलले समान १ विकेट लिए ।
यसअघि टस जितेर पहिला ब्याटिङ गरेको आर्मीले निर्धारित ५० ओभरमा ६ विकेट गुमाउँदै २८७ रन बनाएको थियो । उसका लागि कप्तान विनोद भण्डारीले आक्रामक रुप्मा शतकीय इनिङ खेले । उनले ७६ बलमा ९ चौका र ५ छक्का प्रहार गर्दै नटआउट १११ रन बनाए । यस्तै राजु रिजालले ४५, लोकेश बमले ४२ र राजेश पुलामीले ३८ रनको योगदान दिए ।
गण्डकीका विपिन खत्री र विशाल पौडेलले समान २ विकेट लिए भने दीपेश खत्री र चन्द्र पौडेल १–१ विकेट लिए । प्रतियोगिताअन्तर्गत शनिबार टियू मैदानमै विभागीय टिम एपिएफ र प्रदेश १ भिड्ने छन् । प्रतियोगितामा ३ विभागीय टिमसहित १० टोली सहभागी छन् ।