अब अनलाइनबाटै सरकारी सेवा : मन्त्री गुरुङ
नागरिक एप्स आम नागरिकको सेवालाई सरल, सहज र छिटोछरितो बनाइ लाइनबाट नभई अनलाइनबाट सेवा प्रदान गर्ने महत्त्वपूर्ण प्रयास हो ।काठमाडौं– सञ्चार तथा सूचना प्रविधिमन्त्री पार्वत गुरुङले प्रविधिमार्फत नागरिकका हातहातमै सरकारी सेवा पुर्याउने उद्देश्यले सरकारले ‘नागरिक एप्स’ परीक्षणका रुपमा सञ्चालन गरिएको बताएका छन् । सञ्चार तथा सूचना प्रविधि मन्त्रालयमा आज ‘नागरिक एप्स’को शुभारम्भका क्रममा उनले डिजिटल नेपाल बनाउने सरकारी लक्ष्य पूरा गर्न उक्त एप्स महत्त्वपूर्ण हुने विश्वास व्यक्त गरे ।
‘नागरिक एप्स आम नागरिकको सेवालाई सरल, सहज र छिटोछरितो बनाइ लाइनबाट नभई अनलाइनबाट सेवा प्रदान गर्ने महत्त्वपूर्ण प्रयास हो,’ मन्त्री गुरुङले भने, ‘सरकारी सेवा र सूचना हातहातमा कसरी पुर्याउन सकिन्छ, सबै कागजपत्रलाई सुरक्षित कसरी गर्न सकिन्छ भन्नेमा सरकार गम्भीर छ र त्यसैअनुसार एप्स ल्याइएको हो ।’
सरकारले जनतालाई सार्वजनिक सेवा प्रदान गर्दा डिजिटलाइज्ड समाजको सिर्जना गर्ने उद्देश्यले सरकारले डिजिटल नेपाल कार्यक्रम सुरु गरेको र त्यसैको एक महत्त्वपूर्ण कार्यक्रम नागरिक एप्समार्फत सार्वजनिक सेवा प्रदान गर्न लागिएको हो । सुशासन, समृद्ध र विकासको नाराका साथ डिजिटल नेपाल फ्रेमवर्क कार्यक्रमअन्तर्गत यसले कार्यक्रम गर्नेछ । उक्त कार्यक्रम सरकारको स्मार्ट नागरिक बनाउने उद्देश्यले निर्देशित रहेको सचिव बस्यालको भनाइ थियो ।