जो जहाँ छ, त्यहीबाट दशै मनाऊ : प्रधानमन्त्री
काठमाडौं, कात्तिक १० : प्रधानमन्त्री केपी शर्मा ओलीले जो जहाँ छ, त्यहीँ रहेर दशैं मनाउन आह्वान गरेका छन् । उनले फजुल खर्च नगर्न...काठमाडौं, कात्तिक १० : प्रधानमन्त्री केपी शर्मा ओलीले जो जहाँ छ, त्यहीँ रहेर दशैं मनाउन आह्वान गरेका छन् । उनले फजुल खर्च नगर्न पनि सबैमा अनुरोध गरेका छन्।
प्रधानमन्त्रीले आज शुभकामना सन्देश जारी गर्दै औचित्य र आवश्यकताको वास्तै नगरी आफ्नो सामर्थ्यको समेत ख्याल नगरी आँखा चिम्लिएर उत्सव मनाउने वा फजूल खर्चमा हौसिने जस्ता अभ्यास कुनै पनि कोणबाट उचित होइन भन्दै प्रधानमन्त्री ओलीले यस्ता अभ्यासलाई सच्याएर हाम्रा चाडपर्वलाई मितव्ययी बनाउन आह्वान गरेका हुन् ।
अहिले कोरोना महामारीको विषम परिस्थितिमा चाडलाई विगतभन्दा फरक ढंगले मनाउनु परेको जनाउँदै प्रधानमन्त्रीले आफ्ना मान्यजनसँग टीका, जमरा ग्रहण गर्ने क्रममा अनावश्यक नजिकिँदा हुन सक्ने सम्भावित संक्रमणको खतरा ख्याल गर्न पनि अनुरोध गरेका छन्।
ज्येष्ठ नागरिक, बालबालिका र कमजोर स्वास्थ्य अवस्थाका व्यक्तिमा संक्रमणको सम्भावना ज्यादा हुने भएकाले यसप्रति विशेष सजग भएर नै दशैं मनाउन उनले सबैमा आग्रह गरेका छन् । यसपालिको बडादशैं, हामी जो जहाँजहाँ छौं, त्यहीँत्यहीँ रहेर मनाउन प्रधानमन्त्री ओलीले सबैसँग अनुरोध गरेका छन् ।
संक्रमणको सम्भावित खतरालाई ध्यानमा राखी प्रधानमन्त्री निवासमा हुने ‘बडादशैंको सार्वजनिक टीका कार्यक्रम’ नराख्न निर्देशन दिइएको पनि उनले जानकारी दिएका छन् ।