मंगलबार, चैत्र १८, २०७६

दिल्लीमा भयानक झडप : १३ जनाको मृत्यु, ४ स्थानमा कर्फ्यु 

काठमाडौं, फागुन १४ : भारतको राजधानी दिल्लीमा नयाँ नागरिकतासम्बन्धी कानुनको पक्ष र विपक्षमा उत्रिएका प्रदर्शनकारीहरूबीच भयानक झडप हुँदा कम्तिमा १३ जनाको ज्यान गएको छ ।

ज्यान गुमाउने मध्ये एक जना भारतीय प्रहरी रहेका छन् भने कैयौँ प्रहरीसहित डेढ सय मानिस घाइते भएको भारतीय सञ्चारमाध्यमहरुले जनाएका छन् । लाठी र ढुङ्गा बोकेका भिडले कुटपिट गर्दै हिँड्ने हिन्दूवादी समूहसँग सम्बन्धित नारा लगाएका थिए ।

हिंसाले साम्प्रदायिक स्वरूप ग्रहण गरिरहेको छ। हिन्दू र मुस्लिम भिडबीच झडप भएका छन्। पसल तथा घरहरू जलाइएको बीबीसीले जनाएको छ । पत्रकारहरूमाथि पनि हमला भएका छन्। उनीहरूलाई दङ्गाको दृश्य भिडियो नखिच्न चेतावनी दिइएको छ ।

भारतका गृहमन्त्री अमित शाहले शान्तिको अपिल गरेका छन्। हिंसाले अमेरिकी राष्ट्रपति डोनल्ड ट्रम्पको भारत भ्रमण समेत छायाँमा पारेको छ।

 Published Date: Wednesday, 26th February 07:32:20 AM