‘नेपाल रिक्रिएसन सेन्टर’ को साढे तीन रोपनी जग्गा लिलाम गरिने

काठमाडौं, माघ २७ : क्यासिनोको बक्यौता नतिरेर फरार रहेको ‘नेपाल रिक्रिएसन सेन्टर’को सम्पत्ति लिलाम गरिने भएको छ ।

कम्पनीले संचालन गरेका चार क्यासिनोको ३५ करोड ५० लाख बक्यौता रहेको छ । त्यो रकम असुलउपर गर्न सरकारले कम्पनीको नाममा रहेको साढे तीन रोपनी जग्गा लिलामा गर्ने भएको हो । ‘नेपाल रिक्रिएसन सेन्टर’का संचालक चार वर्ष अघि बक्यौता तिर्न अटेर गर्दै फरार भएका थिए ।

कम्पनीले काठमाडौंमा चार वटा पाँच तारे होटलमा क्यासिनो संचालन गरेको थियो । कम्पनीले होटल सोल्टीमा नेपाल हाउस, होटल अन्नपूर्णमा क्यासिनो अन्ना, होटल ह्यात रिजेन्सीमा क्यासिनो तारा र एभरेष्ट होटलमा क्यासिनो एभरेष्ट संचालन गरेको थियो ।

पर्यटन विभागका महानिर्देशक डुन्डुराज घिमिरेका अनुसार ‘नेपाल रिक्रिएसन सेन्टर’ लाई पटकपटक ताकेता गर्दा पनि बक्यौता नतिरेपछि उसको नाममा रहेको सम्पत्ति लिलाम गर्ने प्रक्रिया अगाडि बढाइएको हो ।

‘नेपाल रिक्रिएसन सेन्टर’ को अनुमति भारतीय नागरिक राकेश वादवाले लिएका थिए । उक्त रकमको अहिले जरिवाना शुल्क जोड्दा झन्डै एकअर्ब रुपैयाँ हुने छ । सरकारले कालिमाटीमा कम्पनीको नाममा रहेको जग्गा लिलाम गरेर बक्यौता उठाउन लागेको हो । “केही दिनमा सार्वजनिक सूचना निकालेर जग्गा लिलाम गर्ने प्रक्रिया अगाडी बढाउने छौं,” घिमिरेले भने ।

सरकारले ल्याएको क्यासिनो निगमावली २०७० को पालना नगरेपछि २०७१ को बैशाख ७ गतेबाट नेपालका सबै क्यासिनो बन्द भएका थिए । सरकारले ल्याएको नियमावली पालना गरेर हाल सांग्रिलाको द मिलेनियम क्वब र सोल्टीको माजोङ र ह्यात रिजेन्सीको प्राइड मात्रै संचालनमा छन् । 

नयाँ नियमावलीमा प्रत्येक क्यासिनो संचालकले चुक्ता पुंजी २५ करोड, बैंक ग्यारेन्टी चार करोड, इजाजत दस्तुर एक करोड र निवेदन दस्तुर पाँच लाख रुपैयाँ व्यवस्था गर्नुपर्ने प्रावधान रहेको छ । सरकारले गत वर्ष साउन ७ गते क्यासिनो नियमावली २०७० जारी गरेको थियो ।

नयाँ नियमावलीअनुसार क्यासिनो संचालनको लागि प्रत्येकले ३५ करोड ५० लाख रुपैयाँभन्दा बढी जोहो गर्नुपर्ने व्यवस्था गरेको थियो । नयाँ व्यवस्थाअनुसार दर्ता प्रक्रियामा आउन ‘द क्रियसन सेन्टर’ अटेर गरेको थियो ।

 Published Date: Sunday, 10th February 2019 2:19:03 pm