बिहीबार, असार २५, २०७७

दीपक बज्राचार्यले ल्याए ‘द कोरोना सङ’

काठमाडौं, जेठ १६ : कोरोना भाइरसबारे सचेतना जगाउन गायक दीपक बज्राचार्यले रिदम व्यान्डको साथमा ‘द कोरोना सङ’ गीत ल्याएका छन्।

यो गीत विभिन्न भाषाको सब टाइटलमा अनलाइनमार्फन सात वटा देशमा एकैसाथ रिलिज भएको छ। गीतको शब्द उनकै व्यान्डका सदस्य रिकि शाक्यका हुन भने यसलाई नेपाली भर्सनमा दीपकले नै गाएका छन्। अंग्रेजी भर्सनमा भने उनकी छोरी चेरिसा बज्राचार्यको स्वर सुन्न सकिन्छ।

अहिले नेपाली र अंग्रेजी भर्सनमा तयार भएको गीतलाई सार्क राष्ट्रका प्रसिद्ध गायकले गाउने तयारी भएको बज्राचार्यले बताए।

युनिसेफ साउथ एसियाको प्रस्तुती रहेको यस गीतलाई केहि दिनमा बङगाली, हिन्दि, उर्दु, भुटानीलगायत साता भाषामा सुन्न सकिनेछ। नेपालको तर्फबाट भने उनको व्यान्डको प्रस्तुति रहनेछ।

अस्ट्रेलियाबाट फर्के लगत्तै लकडाउन सुरु भएपनि उनको व्यान्डका सबै सदस्य  क्वारेन्टाइनमा बसेका थिए। क्वारेन्टाइनमै कम्पोज गरेको रचनालाई आज सार्वजनिक गरिएको हो।

लकडाउनको समयमा कसरी भिडियो तयार पार्नुभयो भन्ने प्रश्नमा उनी भन्छन्, ‘यस भिडियोमा २०–३० जनाको टिमले काम गरको छ। कोरानासम्बन्धी गीत भएकाले यस भिडियोमा दूरी कायम भएको देखाउन अतिआवश्यक थियो। एकआपसमा दूरी कायम गर्न हामीलाई निकै कठिन परेको थियो। पालैपालो गरेर चार–पाँच दिनमा भिडियो बनाएऔं।’

पहिलो दिनको सुटिङ घरको छेउमा भएकाले त्यत्ति अप्ठ्यारो नपरेको उनलाई भिडियोको लागि सरसामन जुटाउन भने मुस्किल थियो। अघिल्लो वर्ष सार्क खेलकुद हँुदा उनले नेपाली कलाकारहरुको निमित्ति विभिन्न सामान बनाएका थिए। संयोगले तिनै सामान घरमै रहेकाले भिडियो सम्पादनमा थप सहयोग पुगेको उनले बताए। नत्र अहिलेको समयमा ठूला घण्टाको प्रयोेग भएको देखाउन नसकिने उनी उनको भनाइ छ।

यस गीतको भिडियोलाई पनि ‘कसले देला धन’ गीतमा देखाइएझैं दृश्य देखाउन मन भएपनि लकडाउनमा सम्भव नभएको उनले सुनाए। ‘गीतमा हाम्रो संस्कृतिमा पौराणिक डाक्टर मानिने झाँक्रीले साबुन पानीले हात धोएको देख्न सकिन्छ। त्यसै गरी लाखेले हातमा स्यानिटाइजर लगाउँछन्। जसबाट हाम्रो संस्कृतिलाई पनि समय अनुसार परिवर्तन गर्नुपर्छ भन्ने हो,’ उनले भने।

चार मिनेटको गीतमार्फत नेपाली संस्कृतिलाई अन्तर्राष्ट्रिय क्षेत्रमा पहिचान गराउन मद्दत पुग्ने उनको विश्वास छ।

 Published Date: Friday, 29th May 17:33:51 PM